Iran feirar revolusjonen - gir amnesti til kristne

 

Middle East Concern (MEC) melder at fleire kristne slapp ut av iranske fengsel i februar, som del av eit generelt amnesti for mange politiske fangar i samband med 44-årsfeiringa av den islamske revolusjonen. Presset mot dei kristne er likevel ikkje mindre.

MEC er ein av NMS sine partnarar i Midtausten. Organisasjonen jobbar særleg for kristne som blir forfylgde på grunn av trua si. På heimesidene sine deler dei informasjon om nokre av dei som er lauslatne den siste tida.

Den 8. februar slapp Saman (Saheb) Fadaye ut av Evin-fengselet i Iran. Han vart arrestert i mai 2016 i lag med fleire andre konvertittar. Han vart dømd til 80 piskeslag for å ha drukke vin under feiring av nattverd, og seinare fekk han ti års fengselsstraff for å ha «handla mot nasjonal tryggleik ved å utbreia huskyrkjer og sionistisk kristendom», som det heiter.

Ei veke etter, blei konvertitten Hadi (Moslem) Rahimi (33) lauslaten frå Evin-fengselet. Moslem vart arrestert for tre år sidan i lag med andre medlemmer av ein husmenighet i Rasht, nord i Iran. I august 2020 blei dei alle tildelt fengselsstraffar på mellom to og fem år for «handlingar mot nasjonal tryggleik». Moslem sjølv fekk ein dom på fire år. Han vart først lauslaten mot kausjon, men har no sete i fengsel sidan januar 2022.

Pastor Yousef Nadarkhani slapp ut 26. februar i år. Han blei arrestert i mai 2016 saman med kona si, Tina, og tre andre konvertittar. Ein av dei var Saman (Saheb) Fadaye, som slapp ut av fengsel 8. februar. Ifølge organisasjonen «For the Martyrs var Nadarkhani 19 år gammal då han konverterte frå islam. Han blei medlem i den evangeliske kyrkja i Iran og er pastor for ein husmenighet med rundt 400 medlemer. Pastoren er blitt arrestert minst fem gonger, er blitt dømd til døden i minst 8 år no, og er blitt forsøkt pressa fleire gonger til å forsaka trua si på Jesus, men har alltid nekta.    

Amnestiet, som omfattar tusenvis av opposisjonelle, er ein del av feiringa av 44-årsjubileet til den islamske revolusjonen. Det folkelege opprøret tok til i januar 1978 og kulminerte i januar og februar 1979 med at Shahen av Iran flykta. Seinare same våren erklærte Ayatollah Khomeini Iran som islamsk republikk. Revolusjonen i Iran vart ein inspirasjon for islamistiske rørsler over heile verda, og utløyste viktige endringar i geopolitiske alliansar som er tydelege enno i dag, 44 år etterpå.  

Sjølv om fleire kristne er lauslatne den siste tida, betyr det ikkje at presset mot kristne iranarar er blitt mindre. Anahita (Anna) Khademi, som slapp ut av fengsel mot ein kausjon på om lag 40 tusen kroner den 28. januar, er framleis skulda for «propaganda mot systemet» og for å ha «forstyrra den offentlege opinionen». Ho er gift med pastor Abdolreza (Mattias) Hagnedjad, som framleis sit fengsla i Lakan-fengselet i byen Rasht, etter å ha blitt arrestert i lag med to andre konvertittar under ei julefeiring den 26. desember. Han sonar ein dom frå 2014, og blei kalla «ein statsfiende» av dommaren under ei rettssak tidlegare same året.   

Amnestiet i Iran er også blitt kritisert av menneskerettsorganisasjonar. Hadi Ghaemi, direktør ved Center for Human Rights in Iran, seier at «den såkalla ‘benådinga’ ikkje er anna enn eit skamlaust PR-stunt som viser kor fullstendig tilfeldig rettferda er i den islamske republikken, der arrestasjonar og lauslatingar skjer etter innfall frå staten».   

«Her må dei heilage halda ut, dei som held seg til Guds bod og trua på Jesus» (Opb 14,12). 

Bloggartikkelen er også publisert på NMS sin Midtøstenblogg. 

Iran: Pastor Mattias fengsla igjen.

 To veker i fridom.  Det var alt iranske pastor Mattias fekk etter tre år i fengsel. 

I eit tidlegare innlegg stilte me spørsmålet om ein dom i iransk høgsterett varsla meir fridom for iranske huskyrkjer. Det var sjølvsagt for godt til å vera sant. Likevel må me halda fram med å be om endring. 

I dag fekk eg E-post frå Middle East Concern igjen, NMS sin partnar for menneskerettar i Midtausten. Dei skriv at pastor Mattias, ein av dei som slapp ut av fengsel ved nyttår, er fengsla igjen.   Abdolreza Ali Haghnejad, som er det offisielle namnet hans, vart arrestert saman med fleire andre i februar 2019 fordi dei involverte seg i huskyrkjer for konvertittar frå islam, og vart såleis rekna som ein trussel mot rikets sikkerhet. Les meir på
MEC sine eigne heimesider. 

Middle East Concern er ein kristen menneskerettsorganisasjon som NMS har støtta økonomisk sidan 1999. Organisasjonen vart starta i 1991 som svar på behov som kristne leiarar i MENA-regionen hadde gitt uttrykk for. MEC støttar menneske i MENA-regionen som er marginaliserte, diskriminerte eller forfylgde for å vera kristne eller for å bli kristne. 

Meir fridom for kristne i iranske huskyrkjer?

 

Ni iranske kristne blei nyleg sett fri frå fengsel etter at høgsterett i landet har slått fast det å delta i huskyrkjer ikkje skal reknast som eit lovbrot som trugar nasjonal tryggleik. 

Dette melder Middle East Concern, ein av NMS sine samarbeidsorganisasjonar i Midtausten. I går var første arbeidsdagen min i NMS, og eg har lenge sett fram til å byrja å jobba med det NMS gjer i regionen.

Situasjonen for kristne i Midtausten, Nord-Afrika og andre muslimsk-dominerte land varierer svært mykje. Mange kristne har stor fridom til å samlast til gudsteneste og til å dela evangeliet, medan andre lever under eit stadig press både frå styresmakter og ekstremistiske grupper. NMS har mange samarbeidspartnarar i regionen som arbeider på ulike måtar med å dela trua på Jesus, kjempa mot urettferd og utrydda fattigdom. Middle East Concern er ein av organisasjonane me samarbeider med, og deira hovudfokus er menneskerettar.  

Pastor Mattias blei sett fri 30. desember og åtte andre slapp ut av fengsel i går, den 3. januar. No skal sakene deira vurderast på nytt. Med det har iransk høgsterett førebels slått fast retten til å samlast i huskyrkjer. Saka er ikkje avgjort enno - ein høgsterettsdom i Iran betyr ikkje nødvendigvis det same som i Norge - og mange andre iranske kristne med islamsk bakgrunn opplever ulik grad av forfølging eller press.

MEC oppfordrar til forbøn for pastor Mattias og dei åtte andre som no er sett fri:

•          At gjennomgangen av sakene deira skal føra til at dei blir frifunne for anklagane
•          At høgsterettdommen skal føra til at andre tilsvarande dommar skal bli tatt opp til ny vurdering.

Les meir om kristne i muslimske land i denne artikkelen frå masteroppgåva om NMS i Midtausten.